Umupilote witwa Yared Getachew w’imyaka 29 ukomoka muri Ethiopia wari ukuriye abari batwaye indege ya Boeing 737 MAX 8 ya Kompanyi ya Ethiopian Airlines,iherutse gukora impanuka igahitana abantu 157,byatangajwe ko hari ubumenyi atari afite ku mashini yafashaga mu kuyobora iyi ndege.
Yared ufite umubyeyi umwe ukomoka muri Kenya ngo hari imashini imwe ifasha mu kuyobora indege (simulator) atari afitiye ubumenyi buhagije bikaba biri mu mpamvu zatumye iyi ndege ikora impanuka ubwo yari imaze iminota 6 ihagurutse ku kibuga Bole International Airport mu mujyi wa Addis Ababa kuwa 10 Werurwe uyu mwaka.
Iyi Simulator nshyashya yari muri iyi Boeing 737 MAX 8,Yared ntiyari ayisobanukiwe neza nkuko umwe mu bapilote bagenzi be yabitangarije Reuters.
Byari byitezwe ko Yared Getachew n’abandi bagenzi be bazahabwa amahugurwa ndetse n’amasuzuma menshi kugira ngo basobanukirwe neza iyi mashini iyobora indege,ariko bamuha kuyobora indege kandi babizi ko nta bumenyi buhagije yari afite.
Iyi ndege ya Boeing 737 MAX 8 yari imaze imyaka 2 ikozwe,ifite uburyo bwikoresha bwitwa MCAS (Maneuvering Characteristics Augmentation System) bufasha kugira ngo indege itamanuka mu kirere nta rutangira ariko umwe mu ba pilote yabwiye Reuters ko abakoze iyi ndege batigeze batanga ibitabo bibusobanura neza ndetse ngo babwumvise mu binyamakuru kurusha uko bari kubumenya babubwiwe na kompanyi ya Boeing.
Ku isi yose abapilote bahabwa amahugurwa mashya ku mashini zifasha mu kuyobora indege (simulators) buri mezi 6.Ntabwo biramenyekana neza niba Yared na mugenzi we wari umwungirije w’imyaka 25 witwa Ahmednur Mohammed bari baratojwe byinshi kuri iyi simulator nshya cyangwa se iyari isanzwe ikoreshwa nayo yari ifitwe n’iyi ndege.
Abayobozi ba Ethiopian Airlines banze bivuye inyuma kugira icyo babwira Reuters ku byerekeye ubumenyi buke bw’aba pilote babo bwatumye imiryango itandukanye itakariza ubuzima mu ndege yabo.
TETA Sandra
